Melkorka Ólafsdóttir

Melkorka Ólafsdóttir stundaði flautunám á Íslandi hjá Bernharði S. Wilkinssyni, Hallfríði Ólafsdóttur og Maríu Cederborg. Vorið 2005 lauk hún B.Mus. gráðu frá Konunglega Konservatoríinu í Haag hjá Emily Beynon, fyrsta flautuleikara Concertgebouw hljómsveitarinnar. Hún lauk mastersgráðu frá Konservatoríinu í Amsterdam ári síðar.

2006-2007 stundaði Melkorka mastersnám með sérhæfingu í hljómsveitar- og kammertónlist við Guildhall School of Music and Drama. Í síðastnefndum skóla hlotnuðust henni James Galway verðlaunin. Árin 2005-2008 sótti hún, samhliða öðru námi, mánaðarlega tíma til Patrick Gallois í París og lauk hjá honum Premier Prix og Prix de Exellance, hvorutveggja með heiðursverðlaunum dómnefndar.

Melkorka hefur sótt fjölda námskeiða innan lands sem utan: hjá William Bennett, Peter Loyd, Jeanne Baxtresser, Michel Debost, Robert Dick, Patriciu Morris, Peter-Lucas Graf, Wissam Boustany, Jacques Zoon, Paul Edmund-Davies ofl.
Melkorka hefur leikið með ýmsum hljóðfærahópum, þ.á.m. í Orkester Norden, Sinfóníuhljómsveit Íslands, Caput, Het Nieuw Ensamble, The Barton Workshop, í Hollensku Óperunni, Rotterdam Fílharmóníuhljómsveitinni og Concertgebouw hljómsveitinni. Í námi sínu í Lundúnum vann hún með hljóðfæraleikurum úr Philharmonia Orchestra og London Symphony Orchestra. Hún er flautuleikari og einn stofnenda kammersveitarinnar Ísafoldar og sinnir á tónleikaárinu 2008-2009 afleysingarstörfum hjá SÍ.

Sumarið 2008 lagði Melkorka, ásamt fiðluleikaranum Elfu Rún Kristinsdóttur, í tónleikaferð um landið en þær stöllur fluttu allar einleiksfantasíur Telemanns fyrir flautu og fiðlu í kirkjum landsins. Hún mun leika flautukonsert Atla Heimis Sveinssonar á tónleikum með SÍ í mars 2009 og verður með tónleika í Tíbrá í Salnum í apríl.

Flautuleikur Melkorku hefur hljómað í Ríkisútvarpinu sem og BBC Radio 3. Henni hafa hlotnast námsstyrkir frá Rotary, Minningarsjóði Jean-Pierre Jacquillat, Minningarsjóðum Margrétar Björgólfsdóttur og Halldórs Hanssens, Glitni, og Landsbankanum ásamt verkefnisstyrkjum frá tónlistarsjóðnum Kraumi og Tónlistarsjóði Menntamálaráðuneytisins.

Til baka á aðalsíðu